Circuito de pump track

 Hoxe vivimos unha xornada moi especial! Cada neno e nena trouxo a súa bicicleta ou patinete e, por suposto, o imprescindible casco para garantir a seguridade de todos e todas.

Puxemos rumbo ao circuíto de pump track de Paredes, onde pasamos unha mañá fantástica desfrutando das curvas, dos saltos e dos diferentes percorridos. Foi unha experiencia moi divertida na que puidemos practicar equilibrio, coordinación e, sobre todo, pasalo en grande cos nosos compañeiros e compañeiras.

O calor acompañounos durante toda a xornada, así que para refrescarnos, gozamos dun bo remollo de mangueira, que nos axudou a combater as altas temperaturas e que provocou moitas risas e momentos inesquecibles.

Día do Medio Ambiente. Vexo, Vexo Xacobeo

 Dentro do marco do proxecto Vexo, Vexo... Xacobeo, o alumnado e profesorado do noso CRA participou nunha xornada moi especial na que combinamos natureza, patrimonio, convivencia e aprendizaxe.

Nesta ocasión realizamos un pequeno tramo do Camiño Portugués, percorrendo o itinerario entre Arcade e Pontesampaio. 

Ao longo do percorrido puidemos gozar das fermosas paisaxes da contorna, observar a riqueza natural da zona e descubrir algúns dos elementos históricos e culturais que fan deste tramo do Camiño un lugar tan especial.

A actividade coincidiu coa celebración do Día Mundial do Medio Ambiente, polo que aproveitamos a xornada para reflexionar sobre a importancia de coidar e respectar o noso entorno. A natureza acompañounos durante todo o percorrido, lembrándonos o valor dos espazos naturais e a responsabilidade que todos temos na súa conservación.