Hoxe celebramos o Día dos Bosques, unha ocasión perfecta para lembrar a importancia que teñen estes espazos naturais para a vida no noso planeta. Para conmemorar esta data tan especial, saímos á contorna e realizamos unha actividade baseada na dinámica do “fío vermello”, que nos axudou a reflexionar sobre a conexión que existe entre nós e a natureza.
Para iso, comezamos coa lectura do conto “Un bosque en mi”, que nos invitou a pensar en como os bosques forman parte de nós e de todo o que nos rodea. A partir da lectura, mantivemos unha conversa na que falamos sobre por que os bosques son tan importantes: porque nos dan osíxeno, serven de fogar para moitos animais e plantas, axudan a coidar o clima e, ademais, son lugares cheos de vida e calma.
Achegámonos ás árbores, abrazámolas e dedicamos un momento a sentilas: a súa cortiza, a súa forza e a tranquilidade que transmiten. Foi unha forma moi especial de conectar coa natureza e tomar conciencia do seu valor.
A continuación, tecemos entre todos un fío vermello que unía as árbores con nós. Este fío simboliza o vínculo que temos co bosque, lembrándonos que formamos parte del e que tamén somos responsables de coidalo e protexelo.
Para rematar a actividade, realizamos unha pequena representación do vivido mediante o debuxo.
Foi un mañá chea de aprendizaxe, emocións e natureza, no que lembramos que os bosques non só están ao noso redor… tamén están, dalgún xeito, dentro de nós.
No hay comentarios:
Publicar un comentario